CYNORTHWY-YDD ADDYSGU in Cardiff

Mae Pennaeth a Chorff Llywodraethol yr ysgol cyfrwng Cymraeg llwyddiannus hon yn gwahodd ceisiadau gan ymarferwyr rhagorol, brwdfrydig a phroffesiynol i ymuno â'n tîm cynorthwyol fel Cynorthwy-ydd Addysgu yn ein Canolfan Adnoddau Arbenigol, Yr Hafan. Mae’r Ganolfan Adnoddau Arbenigol yn darparu addysg arbenigol o’r radd flaenaf ar gyfer dysgwyr o’r Dosbarth Derbyn hyd at Flwyddyn 6 ag anghenion dysgu ychwanegol dwys a chymhleth.

Bydd yn fanteisiol bod gan yr ymgeisydd llwyddiannus afael gadarn ar ddulliau cefnogi dysgu ac addysgu aml-synhwyrol ynghyd â’r gallu i wahaniaethu’n sylweddol at anghenion dysgwyr ag ADY. O dan gyfarwyddyd yr athro/athrawes ddosbarth, bydd yr ymgeiswyr llwyddiannus yn cynorthwyo disgyblion ag anghenion dysgu ychwanegol. Byddant yn sicrhau cynhwysiant a lles ac yn hwyluso mynediad llawn i addysg o safon uchel. Bydd y cynorthwywyr hefyd yn helpu grwpiau o ddisgyblion o fewn y dosbarth ac yn cynorthwyo’r disgyblion oddi ar y safle.

Disgwylir parodrwydd i ddelio â heriau meddygol a hylendid personol y disgyblion a’r gallu i gyd-weithio’n effeithiol a phositif gyda staff, disgyblion, rhieni ac asiantaethau allanol. Rydym yn chwilio am ymarferwyr ymroddgar, hyblyg a threfnus iawn sy'n hunanysgogol, yn gosod safonau uchel ar gyfer eu hunain ac yn gweithio’n ddiflino i sicrhau fod pob disgybl yn cyflawni eu potensial yn llawn.

Lawr lwythwch y disgrifiad swydd a'r fanyleb person am restr lawn o'r cyfrifoldebau a’r sgiliau sydd eu hangen ar ddeiliad y swydd hon. Mae'r gallu i gyfathrebu trwy gyfrwng y Gymraeg yn hanfodol. Am fanylion pellach, mae croeso i chi gysylltu â’r Pennaeth, Mr Dewi Rees. Hoffwn ymestyn gwahoddiad i ddarpar ymgeiswyr i ymweld â’r ysgol a’r dosbarth. Mae gwybodaeth am ein hysgol hefyd ar gael ar ein gwefan.

O dan Ddeddf Addysg (Cymru) 2014, bydd angen i bob Gweithiwr Cymorth Dysgu Ysgolion gael ei gofrestru gyda'r Cyngor Gweithlu Addysg (EWC). Mae’r swyddi hyn yn amodol ar Wiriadau Manylach y Gwasanaeth Datgelu a Gwahardd. Mae’r swyddi gwag hyn yn addas i’w rhannu. Os gwelwch yn dda lawrlwythwch neu argraffwch y ffurflen gais trwy ddewis y botwm “Gwnewch Gais Nawr”.

Rydym yn deall y gallech ddefnyddio DA (deallusrwydd artiffisial) ac adnoddau eraill ar gyfer eich cais; fodd bynnag, sicrhewch fod yr holl wybodaeth yr ydych yn ei rhoi yn ffeithiol gywir, yn wir, yn wreiddiol ac nad yw'n cynnwys syniadau neu waith nad yw'n eiddo i chi. Mae'n ofynnol i ymgeiswyr gwblhau'r ffurflen gais swyddogol gan roi manylion sut mae eu sgiliau, galluoedd a phrofiad yn cwrdd â gofynion hanfodol y fanyleb bersonol ar gyfer y swydd hon. Rhaid i geisiadau gael eu dychwelyd yn uniongyrchol i'r ysgol at sylw’r Pennaeth, Mr. Dewi Rees, erbyn y dyddiad cau isod.

Dyddiad Cau: 05/06/2026 (Canol Dydd). Dyddiad Cyfweld: w/d 15/06/2026.

Mae Diogelu ac Amddiffyn Plant yn flaenoriaethau allweddol i’r Cyngor. Ein nod yw rhoi cymorth i blant ac oedolion sy’n agored i niwed gan sicrhau eu bod mor ddiogel â phosibl. Mae ein gwasanaethau a’n hysgolion wedi ymrwymo i sicrhau diogelwch pob plentyn ac oedolyn sy’n agored i niwed, a byddant yn gweithredu i ddiogelu eu lles. Maent yn cydnabod bod gan blant ac oedolion sy’n agored i niwed yr hawl i gael eu hamddiffyn. Cefnogir hyn yn ethos cyffredinol y Cyngor a’r holl ysgolion.

Fel cyflogwr cyfle cyfartal, rydym yn gwerthfawrogi amrywiaeth. Felly, er nad yw’n ofyniad ar gyfer gwneud cais, rydym yn croesawu ac yn annog ceisiadau gan unigolion nad ydynt yn cael eu cynrychioli’n ddigonol, gan gynnwys:

• y rhai sy’n 25 oed ac iau;
• y rhai nad ydynt mewn addysg, cyflogaeth na hyfforddiant;
• y rhai o’n cymunedau lleol, yn benodol unigolion anabl, gofalwyr a’r rhai o gymunedau Pobl Dduon ac Asiaidd a Lleiafrifoedd Ethnig a LGBT+ Caerdydd;
• y rhai sy’n gallu cyfathrebu’n rhugl yn Gymraeg.