Uwch Athro/Athrawes, Arweinydd yr Ysgol in London

Ydych chi’n athro neu’n athrawes brofiadol sy’n barod i arwain ysgol Gymraeg fach, arbennig ac unigryw? Mae Ysgol Gymraeg Llundain yn cynnig profiad addysgol na cheir yn unman arall yn Lloegr. Fel ysgol gynradd cyfrwng Cymraeg, rydym yn rhoi cyfle i blant Cymraeg ddysgu, chwarae, datblygu a ffynnu drwy gyfrwng y Gymraeg. Mae’r ysgol yn fach, yn gynnes ac yn agos at ei chymuned. Mae pob plentyn yn cael ei adnabod yn dda, ac mae’r berthynas rhwng staff, rhieni, gofalwyr a llywodraethwyr yn rhan ganolog o’n cryfder. Mae Cymreictod yn rhan fyw o’n hysgol. Mae ein disgyblion yn cymryd rhan yn yr Eisteddfod Genedlaethol, yn ymweld â San Steffan, ac yn treulio amser yng Ngwersyll yr Urdd yn Llangrannog. Mae’r Gymraeg, diwylliant Cymru a hunaniaeth Gymraeg wrth galon popeth rydym yn ei wneud.

Y Rôl

Mae hon yn rôl arwain ran-amser i athro neu athrawes brofiadol sy’n dymuno cael effaith uniongyrchol ac ystyrlon. Byddwch yn arwain gwaith yr ysgol o ddydd i ddydd, gan weithio’n agos gyda staff, rhieni, gofalwyr a llywodraethwyr, ochr yn ochr â rhywfaint o addysgu. Mewn ysgol fach, mae arweinyddiaeth yn bersonol, yn weladwy ac yn bwrpasol. Byddwch yn adnabod y plant, yn deall y gymuned, ac yn helpu i lunio dyfodol ysgol sydd â lle arbennig iawn ym mywydau teuluoedd Cymraeg. Mae hon yn rôl i arweinydd addysgol sy’n gallu cyfuno gweledigaeth, trefn, cynhesrwydd a phenderfyniad, ac sydd â gwir ymrwymiad i addysg Gymraeg y tu hwnt i Gymru.

Beth Rydym yn Chwilio Amdano

• Athro neu athrawes gymwysedig a phrofiadol
• Rhuglder yn y Gymraeg, gyda’r gallu i addysgu ac arwain drwy gyfrwng y Gymraeg
• Profiad o arwain ysgol, cyfnod, maes cwricwlaidd neu agwedd sylweddol ar fywyd ysgol
• Sgiliau trefnu, cynllunio a chyfathrebu cryf
• Y gallu i weithio’n effeithiol gyda staff, rhieni, gofalwyr, llywodraethwyr a phartneriaid allanol
• Arddull arwain gynhwysol, gydweithredol a hyderus
• Ymrwymiad clir i’r Gymraeg, addysg ddwyieithog a diwylliant Cymraeg
• Y gallu i gyfuno arweinyddiaeth strategol â phresenoldeb ymarferol o ddydd i ddydd

Pam Ymuno â Ni

Mae cyfleoedd arwain mewn addysg Gymraeg yn brin. Mae’r cyfle i arwain ysgol Gymraeg yn Llundain yn arbennig o brin. Byddwch yn arwain ysgol sydd â phwrpas clir: galluogi plant Cymraeg i dyfu’n hyderus, yn uchelgeisiol ac yn falch o’u hiaith a’u hunaniaeth. Mae hon yn rôl lle mae arweinyddiaeth yn gwneud gwahaniaeth gwirioneddol, nid yn unig i’r ysgol, ond i’r gymuned Gymraeg ehangach. Mae’r rôl yn cynnig cyfle i arwain mewn ffordd agos, ymarferol ac ystyrlon, gan weithio gyda thîm bach a chymuned ymroddedig.

Datganiad Diogelu

Mae Ysgol Gymraeg Llundain, The Welsh School London yn ymrwymedig i ddiogelu a hyrwyddo lles plant, pobl ifanc ac oedolion agored i newid, ac mae’n disgwyl i’r holl staff a gwirfoddolwyr ddeall a rhannu’r ymrwymiad hwn. Mae ymrwymiad cyffredin gennym i ddatblygu diwylliant o barch, lle na chaiff gwahaniaethu ei oddef. Rydym yn croesawu pob cais, gan gynnwys ceisiadau gan bobl o grwpiau sydd wedi’u tangynrychioli ar sail ethnigrwydd, rhywedd, trawsrywedd, oedran, anabledd, cyfeiriadedd rhywiol neu grefydd.