HLTA (Lefel 4) in Porth

Mae Ysgol Gyfun Gymraeg Cwm Rhondda yn awyddus i benodi Ymarferydd Addysgu Lefel Uwch (HLTA) brwdfrydig, profiadol a dibynadwy i fod yn aelod allweddol o dîm cynhwysiant yr ysgol. Chwiliwn am ymgeisydd egnïol a medrus fydd yn arwain ar gydlynu a darparu ymyraethau llythrennedd a rhifedd ar gyfer dysgwyr, gan gefnogi cynnydd, datblygiad sgiliau sylfaenol a chael effaith mesuradwy ar safonau cyflawniad.

Y rôl: Bydd yr ymgeisydd llwyddiannus yn:

• arwain, cydlynu a gwerthuso rhaglenni ymyrraeth llythrennedd a rhifedd ar gyfer unigolion a grwpiau bach o ddysgwyr,
• cynllunio a darparu sesiynau ymyrraeth o ansawdd uchel gan addasu gweithgareddau yn unol ag anghenion dysgwyr,
• monitro cynnydd dysgwyr gan ddefnyddio data ac adborth i lywio ymyraethau pellach,
• gweithio’n agos gyda staff addysgu, arweinwyr pwnc a’r tîm cynhwysiant i gefnogi cyrhaeddiad dysgwyr,
• cefnogi darpariaeth addysgu o fewn y dosbarth ar adegau, gan gynnwys arwain gweithgareddau dysgu,
• hyrwyddo strategaethau effeithiol ar gyfer datblygu llythrennedd a rhifedd ar draws yr ysgol,
• meithrin perthnasoedd cadarnhaol gyda dysgwyr a’u cymell i gyflawni eu potensial,
• hyrwyddo ymddygiad cadarnhaol a lles dysgwyr,
• cyfrannu’n weithgar at ethos cynhwysol yr ysgol a bywyd ehangach yr adran.

Disgwylir profiad perthnasol o weithio mewn rôl addysgu neu gefnogi dysgu, a chymhwyster HLTA neu gyfwerth ar gyfer y rôl hwn.

Rydym yn chwilio am rywun sy’n:

• meddu ar sgiliau cyfathrebu rhagorol ac yn gallu dylanwadu’n gadarnhaol ar ddysgwyr a staff,
• fedrus wrth ddefnyddio data i olrhain cynnydd a chynllunio camau nesaf,
• hunangymhellol ac yn gallu gweithio’n annibynnol yn ogystal ag fel rhan o dîm,
• trefnus iawn ac yn gallu rheoli sawl blaenoriaeth ar yr un pryd,
• ymrwymedig i gynhwysiant, tegwch a lles pob dysgwr,
• dangos agwedd broffesiynol, gadarnhaol ac uchelgeisiol,
• ymrwymedig i addysg Gymraeg ac yn hyrwyddo’r iaith Gymraeg a diwylliant Cymru.

Ynglŷn â’r ysgol: Mae gweledigaeth yr ysgol “Dyheu. Dysg. Daioni.” yn amlinellu ein hymrwymiad i ragoriaeth, tegwch a lles, ac mae’n tanategu pob agwedd o fywyd yr ysgol. Mae Cymreictod a pharch yn greiddiol i’n hethos: parch at ein hunain, parch at eraill a’n hamgylchfyd, a balchder yn ein hiaith, ein diwylliant a’n llwyddiannau ar y cyd.

Lleoliad a chyfleusterau: Mae’r ysgol yn gwasanaethu dalgylch eang ar draws Cwm Rhondda, gyda chysylltiadau rhwydd o fod wedi’i lleoli yn y Porth – tua 20 munud o Gaerdydd ac 20 munud o Ben-y-bont.

Ysgol Newydd i Ysgol Gyfun Gymraeg Cwm Rhondda: Bydd yr ysgol hefyd yn elwa o adeilad ysgol newydd sbon yr 21ain Ganrif, yn dilyn buddsoddiad sylweddol gyda chefnogaeth Cyngor RhCT a Llywodraeth Cymru, gyda gwaith adeiladu eisoes ar y gweill.

Ymholiadau anffurfiol: Am drafodaeth anffurfiol am y rôl, cysylltwch â'r CADY Mrs Rhian Roberts gan ffonio'r ysgol.

Diogelu: Mae Ysgol Gyfun Gymraeg Cwm Rhondda wedi ymrwymo i ddiogelu a hyrwyddo lles plant a phobl ifanc. Bydd yr ymgeisydd llwyddiannus yn destun gwiriadau cyn-gyflogaeth priodol, gan gynnwys gwiriad DBS uwch a geirdaon boddhaol.

Safeguarding Statement: Ysgol Gyfun Cwm Rhondda is committed to safeguarding and promoting the welfare of children, young people and vulnerable adults and expects all staff and volunteers to share this commitment. We particularly welcome applications from under represented groups including ethnicity, gender, transgender, age, disability, sexual orientation or religion.