Athro/Athrawes in Cardiff

Ydych chi’n athro/athrawes brwdfrydig, creadigol ac ymroddedig? Ydych chi’n awyddus i gyfrannu at ysgol Gymraeg fywiog, gynhwysol a chefnogol yng nghalon Caerdydd? Mae cyfle cyffrous wedi codi i ymuno â thîm Ysgol Glan Morfa fel Athro/Athrawes. Rydym yn chwilio am ymarferydd dosbarth rhagorol sy’n angerddol am addysgu, yn ymrwymedig i les a chynnydd pob disgybl, ac sy’n barod i gyfrannu’n gadarnhaol at ethos Cymreig yr ysgol.

Am yr ysgol

Mae Ysgol Glan Morfa yn ysgol Gymraeg hynod lwyddiannus, wedi’i lleoli yng nghymuned fywiog Sblot yng Nghaerdydd. Yn ein harolwg Estyn ym Mehefin 2025, canmolwyd ethos cynhwysol yr ysgol, ein safonau uchel a’r arweinyddiaeth gref sy’n sail i’n llwyddiant parhaus. Rydym yn ffodus i fwynhau adeilad modern ar Ffordd Lewis, sy’n darparu:

• amgylchedd dysgu rhagorol
• chyfleusterau cyfoes
• adnoddau digidol o’r radd flaenaf

Ar hyn o bryd mae 240 o ddisgyblion ar y gofrestr (Ionawr 2026), ac mae’r ysgol yn parhau i dyfu. Mae hyn yn gyfnod arbennig o gyffrous i ymuno â’n tîm, yn enwedig wrth i ni baratoi i agor Canolfan Awtistiaeth newydd sbon ym mis Medi — datblygiad sy’n ehangu ein darpariaeth ac yn cryfhau ein hymrwymiad i gynhwysiant o’r radd flaenaf.

Disgrifiad o’r rôl

Bydd yr Athro/Athrawes Cyffredin yn:

• Addysgu’n effeithiol o fewn y Dysgu Sylfaen neu yng Nghyfnod Allweddol 2.
• Cynllunio a darparu gwersi creadigol, cyfoethog ac arloesol yn unol â Chwricwlwm i Gymru.
• Sicrhau cynnydd cryf i bob disgybl, gan ymateb i’w hanghenion unigol.
• Gweithio’n agos gyda rhieni, cydweithwyr ac asiantaethau allanol.
• Cyfrannu’n gadarnhaol at fywyd ehangach yr ysgol.
• Arddangos sgiliau cyfathrebu rhagorol yn y Gymraeg (llafar ac ysgrifenedig).
• Cynnal ethos Cymreig yr ysgol a hyrwyddo gwerthoedd cynhwysol.
• Cydweithio’n effeithiol gyda Chlwstwr Bro Edern a rhwydweithiau proffesiynol eraill.

Yr ymgeisydd delfrydol

• Ymarferydd dosbarth hyderus ac effeithiol.
• Dealltwriaeth gadarn o strategaethau addysgeg cyfoes.
• Profiad o weithio gyda disgyblion ag anghenion amrywiol.
• Sgiliau rhyngbersonol cryf a dull gwaith cydweithredol.
• Brwdfrydedd dros addysg Gymraeg a datblygiad proffesiynol parhaus.
• Sgiliau cerddorol – byddai hyn yn fanteisiol iawn ac yn cyfrannu’n gadarnhaol at fywyd creadigol yr Ysgol.

Cysylltu

Am sgwrs anffurfiol neu ymweliad: Cysylltwch â Mr Meilir Tomos (Pennaeth) drwy swyddfa’r ysgol. Lawrlwythwch neu argraffwch y ffurflen gais drwy ddewis y botwm “Ymgeisio Nawr”. Rydym yn deall y gallech ddefnyddio DA (deallusrwydd artiffisial) ac adnoddau eraill ar gyfer eich cais; fodd bynnag, sicrhewch fod yr holl wybodaeth yr ydych yn ei rhoi yn ffeithiol gywir, yn wir, yn wreiddiol ac nad yw'n cynnwys syniadau neu waith nad yw'n eiddo i chi.

Amserlen

• Dyddiad cau: 22 Mai am 12:00.
• Cyfweliadau: 2il o Fehefin.

Gofynnir i ymgeiswyr gyflwyno eu llythyr cais yn y Gymraeg.

O dan Ddeddf Athrawon a Addysg Uwch 1998 a Rheoliadau Athrawon (Cofrestru Gorfodol) Cymru 2000, rhaid i bob athro cymwys, sydd wedi'i gyflogi mewn ysgol a gynhelir, fod wedi'i gofrestru gyda Chyngor y Gweithlu Addysg (CGA). Mae’r swydd hon yn amodol ar Wiriad Manylach y Gwasanaeth Datgelu a Gwahardd. Mae’r swydd wag hon yn addas i’w rhannu.

Mae Diogelu ac Amddiffyn Plant yn flaenoriaethau allweddol i’r Cyngor. Ein nod yw rhoi cymorth i blant ac oedolion sy’n agored i niwed gan sicrhau eu bod mor ddiogel â phosibl. Mae ein gwasanaethau a’n hysgolion wedi ymrwymo i sicrhau diogelwch pob plentyn ac oedolyn sy’n agored i niwed, a byddant yn gweithredu i ddiogelu eu lles. Maent yn cydnabod bod gan blant ac oedolion sy’n agored i niwed yr hawl i gael eu hamddiffyn. Cefnogir hyn yn ethos cyffredinol y Cyngor a’r holl ysgolion.

Fel cyflogwr cyfle cyfartal, rydym yn gwerthfawrogi amrywiaeth. Felly, er nad yw’n ofyniad ar gyfer gwneud cais, rydym yn croesawu ac yn annog ceisiadau gan unigolion nad ydynt yn cael eu cynrychioli’n ddigonol, gan gynnwys:

• y rhai sy’n 25 oed ac iau;
• y rhai nad ydynt mewn addysg, cyflogaeth na hyfforddiant;
• y rhai o’n cymunedau lleol, yn benodol unigolion anabl, gofalwyr a’r rhai o gymunedau Pobl Dduon ac Asiaidd a Lleiafrifoedd Ethnig a LGBT+ Caerdydd;
• y rhai sy’n gallu cyfathrebu’n rhugl yn Gymraeg.