Research Associate - Musculoskeletal Biomechanics Research Facility

Cydymaith Ymchwil Cyfleuster Ymchwil Biofecaneg Gyhyrysgerbydol (MSKBRF) Ysgol Peirianneg Caerdydd. Dyfarnwyd cyllid EPSRC i'r Cyfleuster Ymchwil Biofecaneg Gyhyrysgerbydol ar gyfer prosiect ymchwil newydd cyffrous, Piblinell aml-blatfform ar gyfer peirianneg gweithrediad cymal yr ysgwydd ddynol. Bydd y prosiect yn datblygu dulliau newydd i ddeall biofecaneg yr ysgwydd ym maes iechyd, ansefydlogrwydd ac amnewid cymalau, gan ddod â delweddu meddygol uwch, modelu cyfrifiadurol a biofecaneg arbrofol ynghyd mewn cydweithrediad graddfa fawr rhwng Prifysgol Caerdydd, Imperial College Llundain a phartneriaid prosiect rhyngwladol.

Mae poen a chamweithrediad yn yr ysgwydd yn gyffredin iawn ac yn gosod baich sylweddol ar gleifion a gwasanaethau gofal iechyd. Er gwaethaf y defnydd cynyddol o ymyriadau llawfeddygol, gan gynnwys gweithdrefnau sefydlogi ac arthroplasti'r ysgwydd, mae canlyniadau'n parhau'n amrywiol ac yn anodd eu rhagweld. O'i chymharu â'r glun a'r pen-glin, mae'r ysgwydd yn cyflwyno her fiofecanegol arbennig o gymhleth oherwydd bod gweithrediad yn dibynnu ar ryngweithiadau cyd-gysylltiedig rhwng geometreg esgyrn, meinweoedd meddal, dyluniad mewnblaniadau a llwytho cyhyrau.

Mae prosiect ENGIN Shoulder yn mynd i'r afael â'r her hon trwy biblinell aml-blatfform unigryw sy'n rhychwantu delweddu pelydr-X plaen dwbl deinamig in-vivo, modelu cyhyrysgerbydol penodol a phrofion celaneddol wedi'u llywio gan robotiaid. Bydd y swydd ym Mhrifysgol Caerdydd, a bydd yn cyfrannu at waith biofecaneg ysgwydd in-vivo y Cyfleuster Ymchwil Biofecaneg Gyhyrysgerbydol, sy'n gartref i unig gyfleuster pelydr-X plaen dwbl deinamig y DU sydd wedi'i integreiddio â chofnodi symudiad ac electromyograffeg.

Gan weithio'n agos gyda thîm In-Vivo Caerdydd, bydd yr ymgeisydd llwyddiannus yn datblygu ac yn cyflawni dulliau cofrestru delweddau seiliedig ar AI a dadansoddi biofecaneg ar gyfer yr ysgwydd, gan gefnogi piblinell delweddu newydd sy'n cysylltu data in-vivo Caerdydd â gweithgareddau modelu cyhyrysgerbydol a phrofi celaneddol ar draws y consortiwm ehangach. Mae'r rôl yn gyfle ardderchog i weithio mewn amgylchedd ymchwil rhyngddisgyblaethol iawn sy'n rhychwantu peirianneg, orthopaedeg, delweddu a gwyddor data.

Bydd deiliad y swydd yn cydweithio â phartneriaid academaidd a chlinigol blaenllaw yn y DU ac yn rhyngwladol, a bydd yn cyfrannu at ddatblygu dulliau, setiau data a phiblinellau dadansoddi newydd fydd yn helpu i drawsnewid dealltwriaeth o symudiad cymal yr ysgwydd a chefnogi arloesedd clinigol yn y dyfodol.

Yn y rôl, byddwch yn arwain y gwaith o ddatblygu, gweithredu ac integreiddio cofrestru delweddau seiliedig ar AI a dulliau dadansoddi biofecaneg yn rhaglen ENGIN-Shoulder, gan ddefnyddio data a gynhyrchir o lwyfannau pelydr-X plaen dwbl deinamig, cofnodi symudiad, electromyograffi a delweddu MR Caerdydd a chysylltu'r rhain â modelu cyhyrysgerbydol penodol a phrofion celaneddol robotig a gynhelir gydag Imperial College Llundain a phartneriaid y prosiect.

Gan weithio gyda fframweithiau dadansoddi presennol a setiau data sydd newydd eu caffael gan wirfoddolwyr iach a grwpiau cleifion, byddwch yn helpu i ddatblygu piblinell aml-blatfform ar gyfer deall gweithrediad yr ysgwydd, ansefydlogrwydd a biofecaneg amnewid cymalau. Bydd y swydd yn canolbwyntio'n arbennig ar drosi gwybodaeth ginematig sy'n deillio o ddelweddu i lifoedd gwaith dadansoddi cadarn, mireinio dulliau ar gyfer meintioli symudiad ysgwydd gynhenid ac a fewnblannwyd, a chefnogi integreiddio allbynnau biofecaneg in vivo Caerdydd gyda data in silico ac in vitro ar draws y rhaglen ehangach.

Byddai eich prif ddyletswyddau'n cynnwys:

• Gweithio gyda chydweithwyr Caerdydd, Imperial a rhyngwladol i ddatblygu, cymhwyso a mireinio llifoedd gwaith cofrestru delweddau sy'n seiliedig ar AI ar gyfer setiau data pelydr-X plaen dwbl deinamig yr ysgwydd gynhenid ac wedi'i mewnblannu.
• Datblygu ac integreiddio piblinellau dadansoddi biofecaneg sy'n cysylltu pelydr-X plaen dwbl deinamig, cofnodi symudiad, electromyograffi a modelau anatomegol penodol sy'n deillio o MR.
• Cynorthwyo gyda phrosesu, dadansoddi a dehongli data ysgwydd cinemateg gan wirfoddolwyr iach a charfannau cleifion.
• Cyfrannu at ddilysu ac optimeiddio dulliau cofrestru a dadansoddi delweddau gan ddefnyddio setiau data perthnasol in vivo ac in vitro.
• Cynorthwyo gydag integreiddio allbynnau delweddu in vivo Caerdydd gyda modelu cyhyrysgerbydol a gweithgareddau profi celaneddol wedi'u llywio gan robotiaid ar draws y rhaglen.
• Dadansoddi a dehongli data delweddu a biofecaneg i feintioli symudiad yr ysgwydd, mecaneg sy'n gysylltiedig ag ansefydlogrwydd a gweithrediad yn gysylltiedig â mewnblaniad.
• Cyfrannu at guradu, dogfennu a lledaenu llifau gwaith dadansoddi, setiau data sy’n deillio ohonynt ac allbynnau at ddefnydd ymchwil gydweithredol ac agored.
• Gweithio'n agos gyda thîm Caerdydd, clinigwyr a chydlynydd y prosiect i sicrhau bod gweithgarwch dadansoddi’n cyd-fynd â gwaith parhaus i gasglu data, llywodraethu a chyflawni’r prosiect.
• Cyfrannu at adroddiadau, cyhoeddiadau, cyflwyniadau a chyfarfodydd cydweithredol ym mhob rhan o gonsortiwm ENGIN-Shoulder.

Mae hon yn swydd amser llawn (35 awr yr wythnos) o 1 Awst 2026 am gyfnod penodol tan 31 Gorffennaf 2029. Cylog: £41,064 - £46,049 y flwyddyn (Gradd 6). Ni ddisgwyliir y bydd penodiad yn cael ei wneud uwchben Pwynt 32 ar raddfa Gradd 6, £41,064 y flwyddyn.

Os oes gennych ymholiadau anffurfiol am y swydd, cysylltwch â Prof C Holt drwy e-bostio Holtca@cardiff.ac.uk. I gael rhagor o fanylion am weithio yn Ysgol Peirianneg Prifysgol Caerdydd, cysylltwch â Karen Baldwin/Chiara Riolo/Bev Jones drwy e-bostio Enginadmin@caerdydd.ac.uk.

Dyddiad hysbysebu: Dydd Gwener, 15 Mai 2026. Dyddiad cau: Dydd Gwener, 29 Mai 2026.

Mae gan Ysgol Peirianneg Prifysgol Caerdydd Wobr Efydd Athena SWAN sy'n cydnabod arferion cyflogi da ac ymrwymiad i ddatblygu gyrfaoedd menywod sy’n gweithio ym maes gwyddoniaeth. Cyflogwr cyfle cyfartal yw Prifysgol Caerdydd sy’n annog ceisiadau gan unigolion cymwys heb ystyried rhyw, hil, anabledd, oedran, cyfeiriadedd rhywiol, ailbennu rhywedd, crefydd neu gred, statws priodasol neu feichiogrwydd a mamolaeth. Rydym yn annog menywod yn enwedig i ymgeisio am y swydd hon. Byddwn hefyd yn ystyried cynigion ar gyfer cyfleoedd i rannu swydd neu weithio’n hyblyg.

Mae Prifysgol Caerdydd wedi llofnodi Datganiad San Francisco ar Asesu Ymchwil (DORA), sy'n golygu y byddwn, wrth wneud penderfyniadau ynghylch cyflogi a dyrchafu, yn gwerthuso ymgeiswyr ar sail safon eu hymchwil, nid ar sail metrigau cyhoeddi na'r cyfnodolyn y cyhoeddir ymchwil ynddo.

Caniateir i geisiadau gael eu cyflwyno yn Gymraeg, ac ni fydd cais a gyflwynir yn y Gymraeg yn cael ei drin yn llai ffafriol na chais a gyflwynir yn Saesneg.

Meini Prawf Hanfodol: Cymwysterau ac Addysg Gradd ôl-raddedig ar lefel PhD (neu’n agos ag gwblhau/cyflwyno) mewn maes pwnc cysylltiedig neu brofiad diwydiannol perthnasol. Gwybodaeth, Sgiliau a Phrofiad: Arbenigedd a phortffolio diamheuol o waith ymchwil a/neu brofiad diwydiannol perthnasol yn y maes ymchwil biofecaneg gyhyrysgerbydol in vivo, delweddu meddygol a dadansoddi delweddau. Gwybodaeth am statws cyfredol yr ymchwil yn eich maes arbenigol. Gallu diamheuol i gyhoeddi mewn cyfnodolion cenedlaethol/rhyngwladol, cyflwyno mewn cynadleddau cenedlaethol/rhyngwladol a chynhyrchu allbynnau ymchwil perthnasol eraill. Gwybodaeth a dealltwriaeth am gyllid ymchwil cystadleuol er mwyn gallu datblygu ceisiadau i gyrff cyllido.

Cyfathrebu a Gweithio’n Rhan o Dîm: Gallu diamheuol i gyfathrebu'n effeithiol ac yn argyhoeddiadol. Gallu goruchwylio gwaith pobl eraill i roi canolbwynt i waith y tîm ac ysgogi unigolion. Gallu diamheuol i fod yn greadigol, yn arloesol ac i weithio mewn tîm. Gallu diamheuol i weithio heb oruchwyliaeth agos.

Meini prawf dymunol: Cymhwyster(au) proffesiynol perthnasol mewn un neu fwy o'r meysydd canlynol: Peirianneg Feddygol, Biofecaneg, Delweddu Meddygol, Cyfrifiadureg, Gwyddor Symud, neu ddisgyblaeth gysylltiedig. Tystiolaeth o gydweithio â byd diwydiant/y GIG. Tystiolaeth o’r gallu i gyfrannu at rwydweithiau mewnol ac allanol, eu datblygu a'u defnyddio er mwyn gwella gweithgareddau ymchwil yr Ysgol.